冬日九寨溝改咗日期啦

　　詢眾要求, 冬日牟尼溝海螺溝丹巴九寨溝攝影九天團由1月9日星期五, 改為1月10日星期六, 推遲咗一日出發, 回程果日係1月18日星期日,仲由晚機改為早機, 玩足九日, 係報名又想攞首報名優惠就儘快啦, 一成咗團就減優惠啦 !!

加入回應

森波拉三日的收穫

　　去完森波拉返黎幾日啦, 今日同D團友食晚飯, 人人問起我森波拉係咩地方, 好唔好玩, 先至記得要覆番你地有咩好玩添, 遲咗咁多, Sorry Sorry !
　　其實呢個所謂既森波拉奇妙世界, 好似 Bonnie 話齋, 悶D喎, 得兩個表演同埋幾個免費任玩既機動遊戲, 響隔離既火山溫泉設備就豪華啦, 但是溫泉水又唔夠熱, 真定假就見人見智啦, 呢種行程, 當然係包團先至去啦, 點解我要自己帶團? 因為係一班跟咗我十幾年既團友 (佢地睇住我大, 我又睇住佢地D仔女壞), 點都要照顧下既, 咪行咗去幾日囉.
　　三日行程都有個好大既收穫, 就係去咗上岳古民居, 雖然都係鑊耳屋, 但是範圍就比起上次我哋兩天三水荷花世界去過既大旗頭古村大得多啦, 等我又安排一條路線, 同大家一齊去玩下, 影下日落先, 不過要等等啦, 呢輪忙緊好多聖誕既工作, 有拖無欠啦 !!

加入回應

出發去森波拉火山溫泉啦

　　依家係半夜2點37分, 我開始執行李, 準備朝早出發帶團去森波拉奇妙世界, 行程景點仲有石景河, 通天岩, 長湖旅遊區, 都係響晒英德地區, 戲肉當然係森波拉裏面既火山溫泉啦, 等我參觀過後再話你地知好唔好玩啦.

1 個回應

12月7日就快無位啦, 你哋仲等咩呀!!

　　12月7日既蒲苔島海鮮午宴一天遊團友聚會, 雖然名額有150位, 由於反應熱烈, 只係剩番20幾個位喳, 今日同部份團友傾電話, 問佢做咩仲唔報名, 原來係諗住仲有咁耐時間, 慢慢先至報名都未遲喎, 咁你哋就錯啦, 呢個係低於成本價既團友聚會, 識計數既都知係超值啦 (又響度賣花讚花香添, 無計啦, 係事實吖馬, 哈哈!!) 大家快D嗱嗱聲報名啦, 邊有得等呀, 萬一遲咗報名, 就幾熟都幫你唔到啦, 手掌又係肉, 手背又係肉, 唔好令我難做, 係諗住黎一齊玩既, 就快快報名, 報咗名既, 就快快比錢 (哈哈, 呢個係今日寫Blog 既目的呢!!)

2 個回應

12月7日 有緣相聚, 團友活動, 一齊玩啦 !!

　　今日啱啱出咗一個行程, 香港極南蒲苔島一天遊, 點解要搞呢個旅行活動? 因為想同各位團友聚吓, 玩吓囉!! 點解揀蒲苔島? 因為我覺得蒲苔島既奇岩異石真係幾特別呀, 仲有呢個島既歷史同埋傳說, 同埋蒲苔島既位置, 回程果陣可以響架船度睇埋日落吖馬. 費用幾多? 話明係團友聚會, 緊係平過成本價啦, 會員收費 HK$ 99.00 喳, 一百蚊都唔使呀 (係咪玩嘢呢!). 如果親朋想一齊玩, 就要比HK$150.00元 (當然都平過出面旅行社既價錢啦啦!), 要報名就儘快啦 !!

2 個回應

[1][2][3][4]