|
航機燃油稅......"又加" |
今日好忙, 因為要趕住通知D客:8月1日起航機燃油稅又要加, 要出機票就快快出咗先, 無謂增加支出啦".
由8月1日起, 去中國或者東南亞地區, 單程增加HK$60, 來回增加HK$120, 去外國, 燃油稅貴到真係有D嚇死人, 閒閒地都仟幾2仟, 再左轉右轉, 三仟都黎緊頭, 真係"妹仔大過主人婆", 轉機次數越多, 機票越平, 燃油費越貴, 英明既你 (有睇我個BLOG, 緊係英明啦!!), 訂機票要兩條數加埋一齊計, 先至知邊間航空公司抵搭, 邊間旅行社機票平, 唔好淨係睇面價, 比錢果陣先至知, 就無數講呀啦, 唔知就打黎問我啦!!(最好緊係問完就同我買機票啦!!)
唉!! 遲早燃油稅仲貴過機票, 真係無奈!! 可以點......咪照比囉, 上北京就話可以行路啫, 唔通去澳洲、英國、美加、歐洲都行路咩!!
1 個回應 |
|
週末週日黑店, 詐騙的"極品和口暨日式美食周末放題" |
今天星期三, 相信大家又開始諗緊今個週末或暑週日去邊度玩或者去邊度食飯啦, 通常一大班人, 都會鍾意去食下自助餐, 或者係去商場買下野, 有張五星級酒店日本食肆自助餐75折咭, 又覺得好抵, 仲抵過酒店員工優惠添, 咁就會去試下無防, 咁你就中計啦, 本人就有親身經歷一單, 食咗半個星期咁耐歷史, 都係覺得有被人詐騙既感覺, 講出嚟比大家警惕一下 --- 便宜無貪!!
話說上個星期日, 去咗機場富豪酒店地下既空港居酒屋, 食咗一個名為"極品和口暨日式美食周末放題"既任點任食自助餐, 每位原價HK$368.00, 因為住響東涌, 所以有屋苑優惠, 每位HK$258.00, 諗住都幾抵, 點知一坐抵, 就發覺附近幾張枱用既係東涌商場75折優惠券, 心諗"出事啦!!", 不過諗住既來之, 則安之, 可能只係做週末同週日, 應該都係有好嘢既, 加上門口果張大既廣告牌, 影住每位奉送既日本佐賀和牛壽司、肉汁濃郁既牛肉金菇卷, 同埋清新既霜燒和牛沙律, 真係垂涎欲滴......食食食, 幾大都要入去食.
餐廳裏面果D服務生, 極其量只可以稱為伙記, 因為為佢地真係無酒店侍應生既服務水準, 同出面D餐廳仔伙記真係差不多, 拎住個茶壼飲茶, 淨係佢自己見到既杯就沖, 佢見唔到既, 就算你舉晒手佢都睇唔到呀, 叫都睇唔到呀 (都唔明既, 有劉德華同埋詹瑞文既廣告, 人人都已經係口頭禪啦, 佢地都仲可以咁樣既!!).
坐抵無耐, 即刻送上放到亂晒龍既日本佐賀和牛壽司, 壽司飯細件就話係正宗壽司啫, 但是果片和牛, 雖然到依家我都未知係咪和牛, 但是真係切得薄到好似四出既燈影牛肉咁呀, 雖然話明廣告既張只作參巧, 但是都唔好相差得太離譜啦, 話晒都係五星級酒店喎.
跟住送埋和牛金菇卷, 以我呢個去親日本食肆都叫金菇牛肉卷既人黎講, 我根本唔覺得呢件"和牛"金菇卷同我平時食開果D有咩分別.
最後送埋果份霜燒和牛沙律仲離譜, 廣告果張明明係生既和牛, 但是拎黎呢個係炒熟咗既牛肉, 有冇咁離譜呀.
都算啦, 唯有ORDER 其他嘢食, 魚生又係出面百零蚊餐自助餐果幾様, 特別之處係件件都切到超細件, 我以為以去咗小人國開餐.
叫埋日式小食, 其中有一款叫做怪味八爪魚, 真係怪味, 一入口直頭覺得係變味, 立即搵紙巾......
吞拿魚壽司仲要係有血水滲咗落去D飯度, 咁既天氣, 我真係唔想歷史重現...... 食物中毒引致腸胃炎入院咁就認真唔抵啦, 所以唔敢食.
係咪一無是處? 咁又唔係既, 呢間叫做空港居酒屋, 果然無改錯名, 佢地出品既串燒、鐵板燒係可以收貨既, 問題係我無諗住用成三百蚊一位黎食串燒啫.
果晚餐廳客人唔算多, 佢地任點任食都係寫紙仔入廚房, 其實邊款食物無貨, 刪除咗先至比客人都得啫, 佢地就咩都無刪除, 但是你點咗佢又唔會送黎, 叫到第二次都無, 直至問佢地, 先至即刻話你知今日無呢樣無果樣, 當然無既都係貴價野啦, 簡直就覺得被人詐騙.
最後諗住叫埋雪糕甜品, 叫咗十分鐘, 都未有送黎, 都諗住應該係漏單, 搵個經理問下 (驚D伙記全部都係臨時工), 佢跟進之後話我知整緊, 再等多五分鐘, 都未到, 心諗:雪糕啫, 即叫即整既咩, 成廿分鐘都未得, 既然係咁, 咁就要叫埋第二轉先啦, 唔係就變成宵夜自助餐啦. 叫咗唔夠三分鐘, 即係甜品送到, 但係居然係第二轉叫既甜品, 於是同個"侍應"講:我地之前叫咗一轉呀, 麻煩睇下係咪漏單啦. 點知佢轉頭出黎同我地講:或者你地再點過啦, 廚房根本無我地張單.
咁樣既服務, 咁樣既餐廳, 我相信佢只係五星級酒店裏面既租戶, 出品同酒店係完全無關, 但是呢間酒店, 好似所有既餐廳都係出租, 地下仲有間咖啡室, 擺設直頭係茶餐廳格局. 真係想問下酒店管理層:唔怕咁樣會影響酒店形象既咩!!
最後都係奉勸大家, 便宜莫貪, 一分錢一分貨!!
加入回應 |
|
力有不逮的一天 |
今天一位客人前來查問關於9月13日出發之永定土樓三天團事項, 有別於一般客人, 這位客人是屬於聽講有障礙人士, 於是我跟他就靠寫紙仔傳話, 客人看完行程, 表示要報名, 我立即查詢他有否同行人士, 他表示"有", 我只係高興咗10秒, 因為再問就知道, 原來他的朋友亦是視聽有障礙人士, 他表示可用寫紙仔傳話與領隊或導遊溝通, 我並不是擔心增加領隊的工作量, 只係擔心萬一領隊同導遊照顧緊其他團友, 掛一漏萬唔見咗這位朋友, 後果絕對是擔當唔起, 同時領隊亦不會手語. 我唯有心有不忍再寫出 "不好意思, 為著他們安全著想, 他們必需要有一位可以與我們溝通, 幫他們做翻譯, 及可照顧他們的朋友, 一起報名, 我們才可接受他們之參與", 這位客人很失望地離開, 我很內疚, 得到各方面客人的賞識是我們的願望, 但是真的無辦法百份百保証他們能安安全全完成旅程.
3 個回應 |
|
東北健康美食 "黑木耳" , 你食過未 ? |
琴日寫左一大篇網誌, 點知按咗制, 咩都無晒, 跟住又掛住開工, 結果無得閒重覆一遍, 唯有依家再寫過啦 !!
同事啱啱帶完長白山八天團返黎, 買左我指定既黑木耳, 因為舊年朋友食過, 話非常唔錯, 爽口, 所以托我再買比佢 (但是我就未食過), 黑木耳既包裝係壓縮到好似火柴盒咁細盒, 不過都唔平呀, 成30幾蚊人民幣得果八盒"火柴盒喳", 不過話明健康美食吖馬, 緊係貴少少啦, 黑木耳既食法, 可以用凍水浸開咗, 跟住用黎煮麵或者炒菜都得, 涼伴都唔差, 如果你哋去開哈爾濱, 可以去當地既超巿搵搵 (希望唔好比我講到炒起晒D價錢啦!!), 睇下今晚有冇機會整黎試下先.
呢兩日提起精神, 飲兩杯咖啡, 夜半挑燈將9-10月份既壩上草原同埋新疆行程做埋出黎, 大家有興趣, 就可以登入網站睇睇啦 !!
加入回應 |
|
長白山八天團最後召集！！ |
７月６日出發既 "赫圖阿拉古城、鏡泊湖、哈爾濱、南坡、西坡、北坡三路遊東北長白山八天直航團" http://www.kingtoptravel.com/tour/tourdetail.php?tid=t4858a666e2375 已經成團啦, 有興趣既朋友請儘快報名啦!!
加入回應 |
|
|
[1]......[21][22][23]
|
|
|
|
