4月27日及5月12日 霞浦灘塗全方位拍攝五天團成團啦, 要報名就快快快!!

　　Hi, 各位顧客, 現在隆重宣佈,4月27日及5月12日之 "福建--霞浦、寧德灘塗全方位攝影五天直航團已經成團啦, 要報名既朋友, 請儘快啦, 呢d團有限人數呀, 一滿就唔加車呀啦 (費事難安排吖馬, 我哋公司做團最重質量呀喇!)
　　
　　^-^ ^-^ 心郁郁諗緊係咪己又去番一轉睇睇呢......

加入回應

我從世外桃源的藏東回來了!!

　　Hi, 各位團友, 一個復活節假期, 前頭加多幾日, 達成我去藏東林芝九天既願望, 講實話, 之前對林芝既印象真係麻麻地, 因為係西藏既江南, 本人鍾意睇西藏既荒蕪地帶, 對於又草又樹既西藏, 無咩興趣, 所以年年都唔會係自己去, 但是經過今次既九天旅程, 對呢個地方真係完全改觀, 好靚好靚, 搞到我都忍唔住手影咗好多相 (當然唔夠團友影得咁多咁靚啦啦!!), 桃花真係開得好靚, 沿途d景又好靚, 團友之間又玩得開心, 同d四川越野車司機又玩得好開心, 遲d搞掂d相同埋沿途片段, 再比大家欣賞下, 依家比住張啱啱到果日既團體相大家欣賞下, 回程果日都係咁開心呀!! 如果大家團友約埋睇相既, 又想約埋我睇既, 記得通知我呀!!

4 個回應

祭火節八天團的迴響

　　3月13日出發既紅河梯田, 元陽梯田, 彌勒亞細跳月祭火節八天團已經返晒黎啦, 呢次旅程有d失望, 因為彌勒祭火節今年地方官插手入黎搞搞震, 村民同官員大鬥法, 當然無辜既就係我哋班團友啦, 影少咗相囉!
　　
　　Sam 哥作為今次隨團既攝影指導, 除咗響行程當中盡責外, 返黎即刻同我反映果日既情況, 我又將當地地接社既回覆比咗Sam 哥, Sam 哥於是將呢段回覆文字放咗響個blog度, 仲加埋佢第一時間整好晒既旅程相片, 都相當精彩, 大家有興趣, 可以入去睇下 http://hk.myblog.yahoo.com/jw!V_VRUeiBERqQze1BkiGs/article?mid=2275, 如果有咩意見, 歡迎回覆.

4 個回應

youtube 新景象, 等你黎欣賞, 哈哈 ( 搞 get 添 )

　　Hi, 各位團友, youtube已經加入早前出發既緬甸11天行程實況, 同埋舊年同期本人秘密前往福建踩線, 當時有團友問我, 搵咗咩好地方, 我就話要保持神秘感, 留番今年先至比大家睇下, 就係福建既尤溪聯合梯田, 梯田面積相當大, 春耕灌水又多, 淨係無元陽梯田咁斜啫, 有興趣可以上去我哋既youtube 度睇下.
　　
　　同埋順應團友提出既意見, youtube 依家一按入去, 就係最新最 update 既資訊, 唔使次次都係見到我既壩上秋色實況, 睇得舒服好多呀!( 我都覺得次次一按就見到自己個樣, 睇到自山把聲, 有d恐怖), 歡迎入去睇下吖.

2 個回應

潮流興D咩? 魚眼 / 3D

　　琴日施君上黎交錢去4月2日既福建土樓五天團, 問起我拎咩鏡頭去好D, 當然要廣角同埋長距啦, 佢問使唔使拎魚眼, 有......就拎埋啦, 特登買......就無謂啦, 之前都聽 Sam 哥提過, 魚眼以前只值仟零二仟蚊, 依家比D後生仔炒起到變成4仟幾5仟蚊. 一個只係要黎玩下攝影效果既鏡頭, 因為近來潮流興起先至炒起個價錢, 個人認為真係唔多值咁既價錢. 要買...... 不如買 3D 啦, 可見既未來潮流都會興吖馬, 睇下依家電影巿道 (暫時唯有3D效果既電影, 先至一定要去戲院睇, 響屋企睇都唔同效果啦), 仲有陸續出爐既3D電視, 同埋3D相機, 你話係咪寧願儲錢玩3D, 好過買魚眼啦!!
　　
　　前兩日Sam哥拎咗部睇到3D效果既睇相盒黎, 攝影技巧在於同一時間拍攝同一畫面, 將D相放落呢部有3D效果既睇相盒, 影出黎既效果真係好正好正, 有前有後, 有光有暗, 好似睇緊小人國景象一樣, 以為係新玩兒, 原來Sam哥話已經有咗7至8年啦, 不過架生太貴, 無咩人玩之馬, 以下係 Sam哥最新既網誌, 都有提起3D既資訊, 大家有興趣都可以入去八下吖, 知多樣嘢, 唔好比自己out day!!
　　
　　http://hk.myblog.yahoo.com:80/jw!V_VRUeiBERqQze1BkiGs/article?mid=2253&prev=-1&next=1700
　　

加入回應

[1]...[8][9][10]...[23]